Тоҥуоҕа туох буолла?

Ааспыт нэдиэлэҕэ “Whatsapp” ситимин нөҥүө «Тоҥуоҕа туох эрэ түспүт» диэн ис хоһоонноох сурук тарҕанан нэһилиэнньэни аймаата. Сурук ис хоһооно маннык: «Кэнтик сиригэр Тоҥуо диэки тугу гыналлара биллибэт, «УРАЛ» массыыналаах, танкеркалаах дьон баалларын дьон көрбүт. Итини биһиги тойотторбут билэллэрэ дуу, суоҕа дуу? Дьикти кыһын буолла, экспедиция сылдьааччыта суох. Халлаантан дьикти уот Тоҥуо диэки түспүтүн элбэх киһи көрбүт, ракета тобоҕо буолуо дуо диэн санаа баар». Маныаха, Үөһээ Бүлүү улууһунааҕы айылҕа харыстабылын инспекциятын үлэһиттэрэ государственнай инспектор Валентин Никифоров уонна «Госохотохрана» тэрилтэтин үлэһитэ Александр Бороннуров, ыксаллаах быһыы-майгы сулууспатын үлэһиттэрэ буолан икки буранынан Кэнтиккэ тахса сырыттылар. Салгыы Валентин Пантелеймонович кэпсиир: — Буранынан айаннаан иһэн утары танкеркалаах дьону көрүстүбүт. Кинилэр Новосибирскайдааҕы «Сибгеотех» ХЭТ государственнай тэрилтэ үлэһиттэрэ эбит, экспедицияҕа сылдьабыт диэтилэр. Ракета туһунан билбэттэр, нефть, газ саппааһын көрөбүт, сорудаҕынан сылдьабыт дэһэллэр. Сотору-сотору анал прибордарынан салгыҥҥа тыктаран көрөллөр. Салгыы Анаабыр улууһугар айанныылларын, өссө 2-с биригээдэ үлэлии кэлиэхтээҕин эттилэр.